វ៉ាស៊ីនតោនៈ យោងតាមទីភ្នាក់ងារ ព័ត៌មានចិន “ស៊ិនហួ” ចុះផ្សាយនៅថ្ងៃទី០២ ខែមីនា ឆ្នាំ២០១២ថា មូលនិធិរូបិយវត្ថុអន្ដរជាតិ អាយ អឹម អេហ្វ “IMF ” ជំរុញឱ្យ ប្លុកអឺរ៉ុប ធ្វើការត្រួតពិនិត្យ បានល្អិតល្អន់ទៅលើវិបត្ដិបំណុល ។
មូលនិធិខាងលើបានលើកឡើង នៅថ្ងៃព្រហស្បតិ៍ម្សិលមិញនេះថា បណ្ដាប្រទេសនៅប្លុកអឺរ៉ុប គួរតែធ្វើមួយជំហានម្ដងៗ ដើម្បីពិនិត្យទៅលើវិបត្ដិបំណុល ទាំងឡាយ ខណៈដែលសេដ្ឋកិច្ចសកល កំពុងបន្ដការគំរាមកំហែងស្ទើរ គ្រប់តំបន់នោះ ។
អាយ អឹម អេហ្វ បានលើកឡើងនៅក្នុងលិខិតការងារមួយ ពាក់ព័ន្ធនឹងសេដ្ឋកិច្ចសកល ខណៈចូលរួមក្នុងកិច្ចប្រជុំ ជាមួយក្រុមជី២០ កាលចុងសបា្ដហ៍មុនថា “ប្លុកអឺរ៉ុប ត្រូវតែធ្វើការវាស់វែង ឱ្យបានហ្មត់ចត់ទៅលើអ្វីដែលពាក់ព័ន្ធ នឹងបញ្ហាបំណុល ដើម្បីឱ្យការដោះស្រាយទទួលបានជោគជ័យ” ។
មិនតែប៉ុណ្ណោះ អាយ អឹម អេហ្វ និងធនាគារកណ្ដាលអឺរ៉ុប ក៏មានផែនការ ក្នុងការកាត់បន្ថយអត្រាការប្រាក់របស់ខ្លួនដែរ ដើម្បីឱ្យវិបត្ដិដែលកើតឡើងនេះ ធូរស្រាលឡើងវិញ ។
នៅក្នុងលិខិតចេញដោយ អាយ អឹម អេហ្វ ក៏បានសង្កត់ធ្ងន់ថា “ធនាគារកណ្ដាលអឺរ៉ុប គួរតែយកចិត្ដទុកដាក់ លើគោលការណ៍រូបិយប័ណ្ណ ក្នុងនោះរាប់បញ្ចូលទាំង អត្រាតម្លៃឱ្យនៅថេរផងដែរ” ។
